9 خطوات أساسية في روتين العناية بالشعر الجاف

البلسم في روتين العناية بالشعر الجاف:

مهم تختاري لشعرك بلسم يكون مرطب لخصلاته.

اختاري بلسم بالزيوت المرطبه زي الأفوكادوا والأرجان والجوجوبا.

استخدمي البلسم على أطراف شعرك بس، وتجنبي أنه ييجي على الفروة عشان ميسببش القشرة.

الماسك في روتين العناية بالشعر الجاف:

الماسك جزء أساسي من روتين العناية بالشعر الجاف.

الماسكات بتغذي شعرك بعمق وبتخلي شكله صحي ومع الاستخدام المستمر هتمنع من جفاف وتكسر شعرك.

استخدمي الماسك مرة أو مرتين في الأسبوع على الأقل، وزعيه على شعرك كله وسيبيه لمدة ربع أو تلت ساعة وممكن تستخدمي معاه كمان الكاب الحراري عشان تزودي من فايدته، واغسلي بعدها شعرك بالشامبو والبلسم المناسبين لنوع شعرك لأنهم أساسي في أي روتين.

حمام الزيت أساسي في روتين الشعر الجاف:

قبل ما تغسلي شعرك، مهم أنك تعملي حمام زيت عشان تزودي من ترطيب شعرك.

حمام الزيت ليه فوايد كتير زي:

1. بيقوي الشعر.
2. بيقلل من جفاف الشعر وفروة الرأس.
3. بيقلل من تقصف الشعر وتكسره.
4. بيزود تغذية الشعر وبالتالي بيسهل نموه.

لو شعرك جاف أو مصبوغ أو معرض للتقصف، فحمام الزيت من الخطوات اللي مينفعش تستغني عنها.

طريقة عمل حمام الزيت

1. اغسلي شعرك بالشامبو كويس، الزيوت بتُمتص أفضل في الشعر النضيف، ده هيخلي فايدتها أكبر وهتستفيدي بيها أكتر.
2. استخدمي من 3 – 6 معالق كبيرة من الزيت اللي هتختاريه، وسخنيه في حمام مائي أو في الميكروويف لمدة 10 ثواني.
3. قبل ما توزعي الزيت على شعرك، اختبري كمية صغيرة من الزيت على بشرة ايدك عشان تتأكدي أنه مش سخن أوي.
4. وزعي الزيت على كل شعرك، بما فيها الفروة والاطراف واتاكدي أنه وصل لكل أجزاء شعرك.
5. غطي شعرك بالشاور كاب أو الكاب الحراري لمدة من 20-30 دقيقة.
6. اغسلي شعرك بالشامبو واتاكدي أن كل الزيت نزل منه، وبعدين استخدمي البلسم على أطراف شعرك زي ما متعودة.

الليف إن مهم في روتين الشعر الجاف:

اختاري ليف إن Leave in يكون مناسب لطبيعة شعرك الجاف.

الليف إن Leave in هيساعدك تخلي شعرك مترطب، وهيسهل عليكي الستايلنج بتاعه و التحكم فيه.

اختاري ليف إن Leave in يكون غني بالزيوت المرطبة، وحاولي يكون خالي من الكحول لأنه ممكن يجفف شعرك أكتر.

استخدمي الليف إن Leave in على أطراف شعرك بس، من غير ماتقربي من الفروة، لأ،ه ممكن يتراكم على الفروة ويسببلك قشرة والتهابات.

ابعدي عن المياه السخنة في روتين الشعر الجاف:

المياه السخنة والبخار السخن هيجرد شعرك من كل الترطيب اللي فيه.

عشان كده حاولي تتجنبي تماما الشاور بالمياه السخنة أو حمامات البخار اللي بتكون سخنة زيادة عن اللزوم واستبدليها بالمياه الفاترة أو المتوسطة.

لو اضطريتي تستخدمي المياه اليخنة في الشاور، حاولي تقللي وقت الشاور أد ما تقدري وخلي آخر شطفة لشعرك بمياه باردة أو فاترة.

الحرارة بتبوظ خطوات روتين الشعر الجاف:

أدوات التصفيف بالحرارة زي السشوار والمكواة بتدمر الطبقة الواقية حوالين شعرك، ده هيضعف من شعرك وهيزود جفافه.

عشان كده حاولي أنك تقللي من استخدامك للحرارة في تصفيف شعرك قدر الإمكان، ولو مضطرة تستخدميها يبقى خليها على أقل درجة ممكنة عشان تقللي من الضرر الناتج عنها واستخدمي سبراي واقي من الحرارة قبل استخدامها.

قص الأطراف في روتين الشعر الجاف مهم:

الشعر الجاف بيتقصف بسهولة، لكن بمجرد ما اتقصف صعب أنك تعالجيه.

عشان كده مهم أنك تقصي شعرك بانتظام على الأقل كل 3 شهور عشان تحافظي على أطراف شعرك صحية وتساعديه ينمو بصورة سليمة.

امتى توقفي روتين الشعر الجاف؟

الروتين مش هيديكي نتيجة سريعة أو مرة، بالعكس هو اسمه روتين يعني لازم تلتزمي بيه فترة مش أقل من 3 شهور عشان تبدأي تلاحظي نتيجة كويسة في شعرك.

فبلاش تزهقي والتزمي بروتينك وخليه بسيط وحافظي عليه قدر الإمكان، وهتلاحظي الفرق لما تظبطي أكلك كمان لأن في أطعمة بتفرق في صحة الشعر هتلاقيها هنا.